Me diés o tuyo amor en treudo

Me diés o tuyo amor en treudo
por alto pre y cara pensión,
en condizions que no entiendo
cómo podiéi azeutar-las yo.

Casemos y fiziemos papels
con grande boso y fuerte guaranzia,
cómo no li demandéi á o mosén
que fese de bez a carta de grazia?

Mal d'amors

He bebiu d'a mesma fuen
do surten as mías parolas.

No he gustau augua fresca
de nieu zanzera delida,
sino bereno d'escurzón
que me condena á la bida.

Azeto calién esmuyindo-se
por entre un corazón buedo
que te busca y s'alueña
de tu á momentos,
engarcholau por razón
d'os tuyos güellos,
afogau n'a inzerteza
desbrazata d'o zierto.

No bide en ixe augua
a mía cara reflexada,
sino l'ambista pantasmal
d'o calabre d'un alma.

22 de marzo de 2012

Sapientia

I hai puertas
que no se deben trucar,
presonas
a las que no combiene acudir,
glarímas
que no s'han de redamar,
parolas
que nunca no s'abión de dizir,
amors
que ye millor xublidar,
berdaz
que fan más mal que mentir,
prexíns
que más se bale amagar,
sentimientos
prebaus de compartir.

24 de marzo de 2012

L'Ayere

Ricuerdo los tuyos brazos
redoliando lo mío cuello
cuan as parolas d'amor
sinificaban deseyo.

Ricuerdo los tuyos labios
rozando los míos güellos
y as mías mans nabatiando
as auguas d'o tuyo cuerpo.

L'ayere, l'ayere ricuerdo...
Güe no esiste, amor mío,
o maitín ye inzierto.

L'ayere, l'ayere ricuerdo...
porque o pasau, quiesta,
siempre ye estau perfeuto.

Muero, me muero de fredo;
ya no siento a calor,
se be estar esmortezendo
a mía chera interior
en pensar que no me quiers
igual como te quiero yo.

L'ayere, l'ayere ricuerdo...
Porque o presén, bida mía,
lo se lebó l'argüello.

1 d'abril de 2012

Dos estrelas

Dos estrelas bi ha
en o mío zielo,
cadaguna d'a color
d'os míos güellos.

Dos estrelas bi ha,
tiengo dos estrelas:
la una ye de brano,
l'atra i primabera.

En os atardexers
amanixen ristoleras,
cuan se fa de nueis
tintilían con fuerza.

En o zielo nublenco
son dos zendellas,
brilan con rasmia
ta que yo las beiga.

Dos estrelas bi ha,
tiengo dos estrelas:
m'alumbran a bida
con a luna plena.

21 d'abril de 2012